Mrak je. Noč je mirna, a balkonski zid reže mi pogled na, nem rekla sviet jer je te same dijel svieta, makar bi baš to bila najprikladneša reč. No, razmeš ke ti hoču reči?
Da mi je pretjti, veli Symborska. Prešla sem i sobuj odnesla dijel tebe. Fala ti kaj mi to tak daješ, kak da ti je zadnje. A život brze ide, osetiš? Još male i već je zutra, a onda prekzutra, pa prie tri ljeta.Sećam se tvoje hiže gde si odrasla i tvoje mame i tate. I držanja moje ruke pod tvoju glavu gda si mela migrene. Bile mi je žal da te boli, ali sem verovala da te moja ruka i ljubaf lječiju. H postelje su nam tace bile furt spletene i igral je radijo. Sećam se i jabuk. Bile su slatke kak med, dišale su onak kak domača jabuka treba dišati. H tvojem dvorišču su rasle najfiniješe. Denes ih več nema. Te me žalosti.
Na moje ˝primi me˝ ti me primeš, dragaš me. Znam da si tuj. Zanevek. Pipa za toplu vodu furt je bila i je otprta, a dunst tvoje kuhinje i čučekof saft z pire krumperem delicija je nakon tere ne paše jabuka. Delaš najboljše pohance h povesti pohanca. Tie šnicljini zgledaju kak slonovska vuha. Drage mi je da same nas dve jeme i delime zelenjavu z domaće juhe i nema mi drajšega neg gda se tie peršin, vegeta, vlasac i koraba razvlačiju po tanjeru kak rastopljeni sir, gda jeme z rukami i gda pijeme vinčeke. Volim i gda šutime.
Dok ne navršiju osem ljet, vnučeki su ljepljivi, ali med prijatelji nie važne če su ruke, lice, persti ili noge zmazani od lizaljke, blata ili listja.
Ti si moja jedina i najbolja baka tera je podignula četvero svoje dece i pazi na sedmero dece svoje dece. Ti si, morem reči Božica z velikem b. Tvoje ruke su raširene za su decu z celega sela za tere navek skopaš nekakef slatkiš. Negda sem bila ljubomorna na tu decu, zde već nisem. Sad mi se baš oče biti curica tera drži svoju baku za ruku. Za toplu ruku tera ide se stareša i stareša, ali je itak najljepša. Do malo pre nijes opče skužila da maš staračke pege. Ljeta ideju, ali za me si mlada jer ni ja baš ne znam za ljeta, jer tvoje nosim hu sebe, jer mislim na te saki put kad molim Oče naš.
Ona vam je za me, ono ke je detetu mašta. Se. Ona more pobediti saku prepreku na svojemu putu ili se provleči kroz nju ili se skoprcati ispod nje, a more se po nje i popentrati.
I nije bitne če je po hiže blate ili mokre listje, če usisavač denes nie delal, če su jastuki rashitani po podu, bitne je da je tople je i kad je mrzle.
Comments